Deputeti i Partisë demokratike Luçiano Boçi, mbrëmjen e sotme ka reaguar pas deklaratave të njëpasnjëshme nga figura të ndryshme të politikës por edhe të medias, si Edi Rama apo Fatos Lubonja, të cilët e konsideruan të ulët numrin e pjesëmarrësve në protestën e sotme.
Pas ka dëgjuar ç’janë thënë e stërthënë gjatë gjithë ditës, Boçi ka shpërthyer në fund të mbrëmjes duke përdorur fjalë mjaft të forta për kundërshtarët.
“Manipulatorë profesionistë, hartimxhinj skutash, kalemxhinj të neveritshëm, hardhuca të botoksuara, “skribë” fishkëllyes e lloj lloj reptilësh me gjakun të bërë ujë, për shkak të vërtetës së shpalosur sot, po shtrydhin këto orë qelbin e shpirtit të tyre, për të gjetur aty “të metat” e mitingut të Opozitës!?
Mëshirë e keqardhje për këtë kor!
Qytetarët opozitarë triumfuan!”, shkruan Boçi.
Në një status në profilin e tij në Facebook, Rama shkruante sot pas përfundimit të protestës, se pamja në Bulevardin Dëshmorët e Kombit e trishtoi, pasi sipas tij, pjesëmarrja e qytetarëve vërtetoi se PD është kthyer në një fantazëm politike.
“Pamja gjysëm e zbrazët e bulevardit sot, më trishtoi edhe mua, jo më ju! Më trishtoi sepse, pavarësisht se jam kundërshtar natyral i PD-së, nuk ndjehem aspak mirë që një parti e madhe shqiptare, është katandisur sot në një fantazëm të jetës sonë politike, në arratinë e saj prej zgjedhjeve për parlamentin e ri.
Më trishtoi sepse, pavarësisht se as e kam votuar e as kam për ta votuar ndonjëherë PD-në, nuk ndjehem aspak mirë që votuesit e saj kanë mbetur sot jetimë të një republike fantazëm. E cila u premtohet, si oazi i një jete ku rafsha mos u vrafsha, ku të gjitha problemet e kësaj toke, janë të zgjidhura si me magji. Më trishtoi sepse, nuk arrij dot as ta imagjinoj, se si një grusht njerëzish, më saktë dy burra, njëri i tmerruar nga drejtësia e tjetri i lemerisur nga zgjedhjet, ta asgjesojnë një forcë historike si PD-ja, për interesat e tyre krejt vetjake.”, shkruante Rama. (D.D/Shuplaka)
