Vetëm pak minuta pasi u ekzekutua me 4 plumba në derën e banesës ku jetonte në Vlorë, 40-vjeçari Fation Sinani, një automjet ka shpërthyer nga tritoli i vendosur në të.
Ky shpërthim i fuqishëm ndodhi vetëm 100 metra larg vendit ku u ekzekutua Fatjon Sinani dhe ka tronditur gjithë lagjen “15 Tetori” në Vlorë.
Nga ky shpërthim banorët e lagjes kanë dalë të tmerruar nga shtëpitë, pasi shpërthimi ka qënë mjaft i fuqishëm.
“Dëgjuam shpërthim të paparë, sikur plasi bomba”, tha njëri prej banorëve.
“Na ranë pajisjet e shtëpisë, po të mos e kisha kapur desh më ra përtokë edhe televizori”, shtoi ai, shkruan Ballkan Web.
DETAJE:
Rreth orës 22:58, në lagjen “15 Tetori”, autorë të paidentifikuar ende i kanë vënë lëndë plasëse (shpërthyese) automjetit tip Ford Autoveturë me targë AA 987 KP.
Automjeti ka qenë i parkuar në një rrugë dytësore pranë Bashkisë së qytetit, në pronësi të shtetasit E.I., 42 vjeç.
Si pasojë e shpërthimit mjeti është dëmtuar në pjesën e përparme.
Grupi hetimor ndodhet në vendngjarje duke kryer hetimet e mëtejshme në lidhje me sqarimin e rrethanave të këtij rasti.
Po punohet për identifikimin dhe kapjen e autorit. (J.V/SHUPLAKA)
