U lirua nga burgu me anë të amnistisë së fundit të bërë nga shteti, por ditën e djeshme u përfshi në një atentat. Ndësa makina e tij ishte në ecje mbrëmjen e djeshme, ajo shpërtheu duke lënë të plagosur rëndë drejtuesin e saj. Shënjestra e këtij atentati ishte 34-vjeçari Armando Sulo i cili ka marrë dëmtime të rënda, kryesisht në gjymtyrë. Kjo ngjarje ndodhi mbrëmë rreth orës 18:00 në lagjen “Kryengritja”, ka vënë në alarm Policinë e Fierit, e cila mbërriti menjëherë në vend dhe nisi hetimet. Nga verifikimmet e deritanishme rezulton se shënjestra e këtij atentati ka qenë në 34-vjeçari i cili ishte në burg dhe është liruar nga amnistia që u bë në janar.
Arrestimi i 34-vjeçarit:
Policia bëri të ditur se ai është arrestuar në qershor të 2016-s, pasi u kap teksa qarkullonte me automjetin e tij me armë zjarri. Bëhej fjalë për një pistoletë me mulli, për të cilin i riu deklaroi asokohe se e mbante për qejf.
Por policia hodhi dyshime se ai mund të kishte qëllim që ta përdorte në ndonjë krim të mundshëm. Ai u arrestua për veprën penale “prodhim dhe mbajtje pa leje e armëve luftarake dhe municionit”, por u lirua pasi përfitoi amnistinë.
Në lidhje me ngjarjen e mbrëmshme, Policia bëri të ditur se persona ende të paidentifikuar dyshohet se i kanë vënë një sasi lënde eksplozive, tritol mjetit “BMW”, shkruan një portal online.
Sipas të dhënave, sasia ka qenë e vogël, por fakti se makina ka shpërthyer në ecje ngre dyshimet se autorët kanë pasur qëllim eliminimin e tij. Të parët që kanë dëgjuar zhurmën e shpërthimit kanë qenë banorët e lagjes, të cilët njoftuan policinë. (J.V/Shuplaka)
Discussion about this post