Presidenti i Republikës Bujar Nishani, njëherësh Kreu i Këshillit të lartë të Drejtësisë, e konsideron një “katrahurë” gjendjen aktuale të ligjeve në organet e drejtësisë shqiptare.
Sipas një të përditshmeje, Presidenti e ka bërë këtë deklaratë në mbledhjen e datës 20 janar 2017, gjatë debatit për emërimin si magjistratë të tetë të diplomuarve nga Shkolla e Magjistraturës në vitin 2016.
Kjo deklaratë ka ardhur gjatë një debati për situatën ligjore në të cilën ndodhet Këshilli i Lartë i Drejtësisë, në vijim të një reagimi të anëtarit të zgjedhur nga Kuvendi, Sokol Çomo.
Anëtari Çomo ka shprehur shqetësim në lidhje me faktin se ditën e mbledhjes anëtarëve të KLDsë u është shpërndarë një material i titulluar “Mbi planin e veprimit të KLDsë gjer në ngritjen e KLGJsë.
“A mundet një subjekt i këtij Këshilli t’i japë një shpjegim pse ky raport, që mban datën 30.12.2016, nuk është shpërndarë për anëtarët e Këshillit, por na jepet vetëm sot në mbledhje dhe jemi para situatës që vetëm sot duhet të marrim në diskutim një çështje që duhet ta kishim marrë 2 muaj më parë”, ka pyetur Çomo, duke iu drejtuar kreut të Këshillit.
Por presidenti ka kërkuar largim nga tendenca për spekulime ndaj çështjeve funksionale të KLD-së.
Po aq kritik raportohet të ketë qënë edhe ministri i Drejtësisë, Ylli Manjani.
“Nuk është e qartë se mbi ç’ligj do të zbatohej vendimmarrja për emërimin e magjistratëve.”-mësohet të jetë shprehur ai. (A.H/Shuplaka)
Discussion about this post