Futbolli europian u trondit nga tre shpërthime pranë autobusit që po transportonte ekipin e Borusia Dortmundit nga hoteli në stadium për ndeshjen ndaj Monakos në Ligën e Kampioneve.
Pas ngjarjes ku mbeti i dëmtuar lehtë në dorë mbrojtësi Mark Bartra, bota e futbollit u bë bashkë në mesazhet e solidaritetit ndaj ekipit gjerman.
Solidarizimi filloi menjëherë pasi drejtori i Borusias, Hans-Joakim Vacke, bëri të ditur atë çfarë kishte ndodhur, me mbështetësit e ekipit mik që filluan koret “Borusia, Borusia”.
Për t’ua shpërblyer, gjermanët nisën një fushatë në rrjetet sociale për t’u ofruar një vend për të kaluar natën tifozëve francezë që mbetën në Dortmund pas shtyrjes së ndeshjes për të mërkurën.
Me sloganin“Një shtrat për tifozët miq”, mijëra mesazhe vërshuan në ndihmë të mbështetësve të Monakos.
Fushata u mbështet edhe nga faqja zyrtare e Borusias në “Twitter”, raporton The Telegraph.
“Të dashur tifozë të Monakos. Nëse keni nevojë për strehim në Dortmund, ju lutem lidhuni me hashtagun #bedforawayfans”, ishte postimi i klubit gjerman. (M.D/ Shuplaka)
Discussion about this post