Ardian Jahaj është emri i shqiptarit që mëngjesin e sotëm ishte nisur nga Italia në drejtim të brigjeve tona me një skaf të cilit i ka mbaruar karburanti.
Si pasojë e kësaj dhe kushteve të këqia atmosferike, vetëm para pak minutash është bërë e mundur gjetja e drejtuesit të skafit. Ai është gjetur nga anija “Oriku” pranë Gjirit të Durrësit.
Për shkak të kushteve të këqija atmosferike, u ngrit edhe një helikopter Cougar i Forcës Ajrore, në ndihmë të operacionit të kërkim – shpëtimit.
Bashkë me këtë të fundit, Forcat Detare kanë shpëtuar dhe një person tjetër me shtetësi italiane.
Ngjarja
Rreth orës 06:00, shtetasi Fatjon Jahaj informoi Policinë Kufitare se babai i tij, Adrian Jahaj është nisur nga Italia drejt Shqipërisë me një skaf privat.
Në distancën 10 milje në veriperëndim të ishullit të Sazanit dhe në grykëderdhjen e lumit të Vjosës, i ka mbaruar karburanti dhe ka kërkuar ndihmë.
Policia Kufitare kërkoi ndihmë tek Qendra Ndërinstitucionale Operacionale Detare, QNOD, duke vënë në lëvizje të menjëhershme Forcën Detare, e cila nisi për ndihmë dy anije, njërën nga Sazani dhe anijen tjetër nga Pashalimani.