Të tjera detaje zbulohen nga ngjarja e rëndë e një dite më parë, që ndodhi në plazhin e Velipojës, ku një 34- vjeçar nga Kosova humbi jetën, pasi u fut të shpëtonte gruan e tij e cila rrezikonte të mbytej në det.
Feriz Hasani, 34 vjeç, banues në Prishtinë, ka humbur jetën në tentativë për të shpëtuar bashkëshorten e tij. Mirëpo ai vuante nga kriza epileptike dhe nuk e kishte të këshillueshme që të futej në ujë për t’u larë, por edhe pse e dinte këtë, ai vendosi të rrezikonte për të shpëtuar bashkëshorten e tij.
Gruaja e Hasanit është futur në ujë për t’u larë, por teksa ka qenë duke notuar ka pasur një vështirësi dhe ka rrezikuar të mbytet. Bashkëshorti i saj ka arritur që ta dallojë nga larg dhe me shpejtësi ka notuar drejt saj për ta shpëtuar. Feriz Hasani ka mbërritur në kohë për të shpëtuar të shoqen, e cila ka arritur të dalë e gjallë në breg. Mirëpo Ferizi është mbytur. Pasi ka shpëtuar bashkëshorten, ai ka tentuar që të dalë në breg, por edhe për shkak të sëmundjes, ai nuk ia ka dalë dot.
Edhe pse pushuesit e tjerë kanë ndërhyrë për t’i ardhur në ndihmë dhe e kanë dërguar në qendrën shëndetësore të Velipojë, 34- vjeçari ka mbërritur pa jetë në spital. Një tjetër tragjedi kjo e ndodhur në bregdetin shqiptar, për shkak të mungesës së rojes bregdetare. (D.D/Shuplaka)
Discussion about this post