Gjykata e Posaçme Kundër Korrupsionit dhe Krimit të Organizuar (GJKKO) ka shtyrë për në datën 13 janar gjyqin për padinë e shpifjes të ngritur nga ish-drejtori i Policisë Shkodër, Edmond Sula, ndaj deputetit të PD-së, Gazmend Bardhi.
Shtyrja e seancës erdhi pasi deputeti Bardhi nuk kishte marrë dijeni për zhvillimin e saj. Në seancën e sotme ishte i pranishëm vetëm paditësi, Edmond Sula.
Në seancën e mëparshme, palët refuzuan ta zgjidhnin konfliktin përmes pajtimit, çka e detyroi Gjykatën e Posaçme ta kalojë çështjen në proces gjyqësor.
Padia e Edmond Sulës ndaj Bardhit lidhet me deklaratat e këtij të fundit në Kuvend, më 12 shtator, ku akuzoi ish-drejtorin e Policisë Shkodër për lidhje me bandat kriminale. Bardhi lexoi komunikime të pretenduara nga aplikacioni Sky ECC, të cilat, sipas tij, përbëjnë prova që emërimi i Sulës ka qenë i diktuar nga krimi i organizuar.
Përveç kësaj çështjeje, Gazmend Bardhi është paditur në GJKKO edhe nga OSHEE për akuza të ngjashme.
Gjyqi pritet të zhvillohet më 13 janar, ku do të vijohet me shqyrtimin e padisë.
