Shtetet e Bashkuara kanë pezulluar përkohësisht disa dërgesa armësh për Ukrainën, njoftoi Shtëpia e Bardhë të martën, në një kohë kur lufta e Rusisë ndaj Ukrainës është intensifikuar ndjeshëm. Vendimi u mor “për të vënë interesat e Amerikës në radhë të parë”, pas një rishikimi të Departamentit të Mbrojtjes mbi mbështetjen ushtarake të SHBA ndaj vendeve të tjera, sqaroi zëdhënësja e Shtëpisë së Bardhë, Anna Kelly.
Sipas agjencisë Reuters, ndër armët që preken nga pezullimi janë raketat kundërajrore dhe municionet precize. Zyrtarët amerikanë nuk dhanë detaje se cilat dërgesa specifike janë ndalur dhe Ukraina ende nuk ka reaguar publikisht.
SHBA ka dërguar dhjetëra miliarda dollarë ndihmë ushtarake që nga fillimi i pushtimit rus në shkurt 2022, por disa zyrtarë të administratës Trump kanë shprehur shqetësime se rezervat ushtarake amerikane po shterojnë.
Zëvendëssekretari amerikan i Mbrojtjes për Politikat, Elbridge Colby, tha se “Departamenti po e shqyrton me rigorozitet dhe po përshtat qasjen e tij për të ruajtur gatishmërinë e forcave të SHBA sipas prioriteteve të administratës”.
Ky vendim vjen pak ditë pas takimit mes Presidentit Donald Trump dhe Presidentit ukrainas Volodymyr Zelensky gjatë samitit të NATO-s në Holandë. Gjatë këtij takimi, Trump shprehu mundësinë e ofrimit të më shumë sistemeve mbrojtëse Patriot, por pa bërë premtime konkrete.
Marrëdhëniet mes dy liderëve janë karakterizuar nga tensione, përfshirë një përballje të ashpër në Zyrën Ovale në mars, pas së cilës Trump pezulloi përkohësisht ndihmën ushtarake dhe ndarjen e inteligjencës – veprime që më pas u anuluan.
Në prill, SHBA dhe Ukraina nënshkruan një marrëveshje që i jep Uashingtonit qasje në rezervat minerale të Ukrainës në këmbim të mbështetjes ushtarake.
