“Para dy ditësh morëm informacion që njerëz, që lehtësisht mund të verifikohen se me kë janë të lidhur në katërshen, kanë komunikuar me persona në burgje duke i nxitur që të marrin në dorë pjesë të tyre të revolucionit imagjinar dhe pas këtij informacioni del letra e Presidentit.
Nëse do të ishte shqetsuar nuk do të rendte ka publikonte letrën që e ka dërguar në adresën e gabuar. Pavarësisht se ndihet komandanti super, ai nuk ka të drejtë tu drejtohet drejtorëve, por ministrave”, kështu u shpreh sot në Kuvend kryeministri Edi Rama, teksa i referohej letrës së presidentit Meta për sigurinë në burgje.
Meta i dërgoi dje një letër Drejtorit të burgjeve, Agim Ismaili, ku i kërkoi informacione për sistemin e sigurisë në burgje. Mësohet se Meta ka kërkuar të merren të gjitha masat për sigurinë në burgje, për shkak të situatës së tensionuar në vend.
Nga ana tjetër ka ardhur mbrëmjen e djeshme dhe reagimi i drejtorisë së përgjithshme të burgjeve.
“Drejtoria e Përgjithshme e Burgjeve deklaron se situata është në normalitet të plotë dhe se janë marrë të gjitha masat e nevojshme sipas protokolleve të sigurisë të sistemit penitenciar, kjo edhe në përputhje me zbatimin e procedurave për 41 bis. Garantojmë për normalitet të plotë në sistemin penitenciar dhe për shërbimin ndaj personave të paraburgosur dhe të dënuar, në përputhje me legjislacionin për të drejtat dhe trajtimin e tyre.” thuhet në njoftimin per shtyp të kësaj drejtorie e cila kerkon gjithashtu nga mediat që në informacionet që bëjnë publike, ti referohen komunikimit me institucionet përgjegjëse.
(E.K/Faxweb.al)
Discussion about this post