“Shqipëria Bëhet”, Florjan Binaj: Të jemi zëra të bashkuar përpara çdo gjëje që mund të ndodhë

Florjan Binaj, ka folur për lëvizjen “Shqipëria Bëhet”, ku ka treguar se si lindi ideja e kësaj lëvizjeje dhe cilat janë idetë që ata duan të bëhen realitet.

Në një intervistë në FaxNews, me gazetaren Jonida Omeri, Binaj ka theksuar dhe një herë 4 pikat kryesore të “Shqipëria Bëhet”, ku janë reformimi i sistemit zgjedhor, referendumet, vota e emigrantëve dhe depolitizomi i administratës.

Binaj është shprehur mbi idenë e bashkimit për të krijuar një lëvizje të tillë, ku thotë se të gjithë anëtarët, njiheshin me njëri-tjetrin më parë, kur kanë protestuar apo ngritur zërin për probleme të ndryshme me të cilat përballen qytetarët shqiptarë.

Ishin tani kushtet e duhura për ngjizjen e kësaj lëvizje, për të cilën Binaj thotë se është pritur mjaft mirë publiku, duke iu referuar këtu dhe takimit të parë me qytetarët në Mirditë.

Florjan Binaj: Ishim i njëjti grup të njohurish, që mblidheshim gjithmonë për të ngritur zërin për padrejtësitë që bëheshin në Shqipëri. Mblidheshim në protesta të gjithë së bashku. Lindi ideja pse të mos bëjmë më të organizuar këtë, të jemi shumë zëra të bashkuar përpara çdo gjëje që mund të ndodhë. Janë shumë persona publikë me të cilët ndajmë të njëjtat ide.

“Shqipëria Bëhet”, nga shumë ide që kemi pasur, është e kundërta e asaj që dëgjojmë çdo ditë. Në programin tonë janë 4 pika kryesore që mund t’i bëjë çdo qeveri.

1. Reformimi i sistemit zgjedhor në Shqipëri duke hapur konkurrencën nëpërmjet hapjes së listave, kufizimit të mandateve qeverisëse dhe përfaqësuese;
2. Miratimi i ligjit “Për referendumet” në Republikën e Shqipërisë;
3. Miratimi i votës së emigrantëve duke përcaktuar modalitetet e përfaqësimit të tyre.
4. Depolitizimi i administratës zgjedhore në të gjitha nivelet duke e hequr atë nga politika dhe duke e kaluar në profesione të lira (avokat, noter, profesionistë të licencuar, si dhe përfaqësues të sistemit të drejtësisë si gjyqtarë dhe prokurorë);

Në takimin e parë në Mirditë nuk e prisnim që do të vinin aq shumë njerëz. Shqetësimi më i madhi njerëzve është që rinia është duke ikur. Jo nga përtacia, por këtu më të zotë quhen ata që shajnë në TikTok se sa ata që shërojnë në spitale. Faji është i mënyrë se si është ndërtuar sistemi.

“Shqipëria Bëhet”, erdhi tani sepse duhej të plotësoheshin kushtet që të arrinim në këtë pikë. I gjithë grupi është duke sakrifikuar për kauza që janë më të mëdha se ne.