Ministri i Jashtëm në detyrë Gent Cakaj, ka bërë të ditur se Shqipëria do të bojkotojë ceremoninë e ndarjes së Çmimit Nobel në letërsi që do të mbahet më 10 dhjetor në Stokholm.
Shkak është dhënia e këtij çmimi shkrimtarit austriak Peter Hanke, një adhurues i ish ish-presidentin serb, Sllobodan Millosheviç, që shqiptarët, por dhe më gjerë e konsiderojnë “Hitleri i Ballkanit” për krimet e tij gjatë luftërave në ish-Jugosllavi në fund të viteve ’90.
“Kemi udhëzuar ambasadorin e Shqipërisë në Suedi që të bojkotojë ceremoninë”, shkruan Cakaj në Twitter.
Para Shqipërisë bojkotimin e kishte deklaruar edhe Kosova. Akademia e Shkencave të Kosovës ka kërkuar që të anulohet Nobeli për Handken.
Edhe Akademia e Shkencave e Shqipërisë në një letër, drejtuar Akademisë së Shkencave në Suedi e quajti akt të rëndë të dhunimit të vlerave njerëzore.
Reagimi i plotë i Cakajt:
Çdo shpërblim i personaliteteve që kanë mohuar gjenocidin edhe nëpërmjet veprave të tyre letrare, vetëm forcon prirjet për t’iu shmangur përgjegjësive historike dhe relativizuar peshën e rëndë të krimeve të luftës, pastrimit etnik dhe gjenocidit. Ndaj, Shqipëria do të bojkotojë ceremoninë zyrtare të ndarjes së Çmimit Nobel për Letërsi.
Përkushtimi ynë, ndërkaq, do të vazhdojë për promovim të marrëdhënieve të mira fqinjësore bazuar në vlerat e patjetërsueshme të së vërtetës dhe në përputhje me kërkesat më të larta të drejtësisë.
Discussion about this post