Shqipëria ka numrin më të lartë të nxënësve për një mësues në rajon, pavarësisht uljes së numrit të të rinjve për shkak të emigracionit dhe përfshirjes në trend të plakjes së popullsisë.
Ky përfundim është arritur nga Banka Botërore, e cila ka bërë një krahasim global të këtij treguesi dhe ka gjetur se Shqipëria në vitin 2014 kishte mesatarisht 19 nxënës për një mësues.
Në vendet e tjera të rajonit ky tregues është më i ulët. Në Maqedoni është 15, në Bosnje 17, në Serbi 16 dhe në Kroaci 14.
Vendet e Evropës dhe ato të zhvilluara karakterizohen nga një numër i ulët i nxënësve për mësues, me vetëm 15.
Ndërsa në vendet në zhvillim dhe ato të varfra (kryesisht në Afrikë), numri i nxënësve për një mësues është shumë i lartë, më shumë se 40.
Në vitin 2014, mesatarja globale e këtij treguesi arriti në 24 nxënës për një mësues. Ndërsa në vitin 1970, mesatarja e këtij treguesi ishte 28 nxënës për mësues.
Në vjetarin statistikor të Ministrisë së Arsimit thuhet se ka një tendencë në ulje të numrit të nxënësve për arsimin bazë. Ky fakt shpjegohet me uljen e numrit të lindjeve dhe dukurisë së emigrimit.
Por kur bëhet fjalë për arsimin e mesëm, vit pas viti kemi një rritje të numrit të nxënësve për mësues.
Revista Monitor përmend një sërë faktorësh që kanë ndikuar në rritjen e këtij numri: politikat dhe reformat e qeverisë për arsimin, rritja e interesit të komunitetit të nxënësve dhe prindërve për arsimim përtej arsimit bazë.
Në 2008-2009 ka patur rënie të numrit të nxënësve në arsimin e mesëm, pasojë e kalimit të arsimit bazë nga sistemi 8- vjeçar në sistemin 9- vjeçar. Pavarësisht kësaj, përsëri kemi numrin më të lartë në rajon.
Discussion about this post