Pas vëmendjes së madhe që iu dha figurës së Heroit Kombëtar, Gjergj Kastrioti Skënderbeut vitin e kaluar, vit i cili u shpall edhe si “Viti i Skënderbeut”, këtë vit mesa duket askush nuk është kujtuar për të bërë qoftë edhe një urim apo shprehur një mirënjohje për të në ditën e ditëlindjes së tij.
Gjergj Kastrioti, i lindur më 6 maj 1405 ditën e sotme ka shënuar 614 vjetorin e tij. Ndërsa në një shkrim të tij Zevendeskryetari i LSI-se, Luan Rama ka kritikuar mungesën e vëmëndjes ndaj Heroit Kombëtar në këtë përvjetor të tij të lindjes duke u shprehur se “nderimi, respekti, mirënjohja e dedikimi shtetëror e i çdo shqiptari nuk mund të jetë vetëm jubilar dhe as sipas qasjeve individuale apo shijeve sezonale të qeverisë.”
Duke ironizuar mos përkujtimin e datës së lindjes së Skënderbeut Luan Rama shperhet se “përkujtimi i datës së lindjes është tepër i rëndësishëm pasi që më parë se të ketë një datë të vdekjes, Skënderbeu ka një datë të lindjes gjë që me sa duket mungon në kalendarët e autoriteteve shtetërore në Shqipëri!”
Mirëpo, në kritikat e tij Luan Rama nuk ka kursyer as akademikët e profesorët e historisë, të cilët sikurse është shprehur ai, nuk thanë as edhe një fjalë të vetme në ditën e lindjes së Heroit tonë duke u shprehur se kjo negrizhencë apo harresë ndaj kësaj figure është për të ardhur turp.
“As akademikë e profesorë, as historianë apo institucione që mbajnë emrin e tij, nuk dënjuan ta përmendin e të thotë një fjalë të vetme!
Mbase ata e harruan! Ose ndoshta më e saktë është të them që nuk e dinë se sot Skënderbeu ka datëlindjen! Turp është pak! Çfarë shteti – asnjë veprimtari, asnjë fjalë në datën e lindjes së Heroit Kombëtar të shqiptarëve!”
Shkrimi i plotë i Luan Ramës:
Çfarë shteti – asnjë veprimtari,
asnjë fjalë në datën e lindjes
së Heroit Kombëtar, Skënderbeut!
Viti i Skënderbeut, siç u shpall prej qeverisë shqiptare viti 2018 në përkujtim të 550 vjetorit të vdekjes së Heroit Kombëtar të shqiptarëve, ngjan shumë i largët jo në kuptimin kohor, po prej harresës dhe hipokrizisë shtetërore, prej fallsitetit e fasadës butaforike.
Sepse, nderimi e respekti, mirënjohja e dedikimi shtetëror e i çdo shqiptari ndaj Heroit Kombëtar të shqiptarëve nuk mund të jetë vetëm jubilar dhe as sipas qasjeve individuale apo shijeve sezonale të qeverisë.
Aq më tepër, që më parë se të ketë një datë të vdekjes, Skënderbeu ka një datë të lindjes, që me sa duket mungon në kalendarët e autoriteteve shtetërore në Shqipëri!
Nderimi e respekti për Heroin tonë Kombëtar, për Gjergj Kastriotin, për Skënderbeun shqiptar, duhet të jetë i përhershëm dhe i përjetshëm!
Mirëpo, për fat të keq e për turpin e autoriteteve shtetërore shqiptare, nuk ka ndodhur e nuk po ndodh kështu!
Sepse sot në datën e lindjes së Gjergj Kastriotit, i cili ka lindur më 6 maj 1405, askush ndër autoritetet shtetërore, as qeveria e Edi Ramës, as Presidenti i Republikës, por as akademikë e profesorë, as historianë apo institucione që mbajnë emrin e tij, nuk dënjuan ta përmendin e të thotë një fjalë të vetme!
Mbase ata e harruan! Ose ndoshta më e saktë është të them që nuk e dinë se sot Skënderbeu ka datëlindjen!
Turp është pak!
Çfarë shteti – asnjë veprimtari, asnjë fjalë në datën e lindjes së Heroit Kombëtar të shqiptarëve!
Discussion about this post