Gazeta zvicerane “20 Minuten” e cilëson Shqipërinë si një vend që së shpejti mund të shndërrohet në një “Spanjë” përsa i përket turizmit. “Ka ende shumë pak hotele ndërkombëtare në Shqipëri. Ne jemi të kënaqur me rezervimet. Ky vend tërheq njerëz, të cilët janë njohur me shumicën e vendeve në Europë dhe duan të shohin diçka të re apo të papritur. Dhe diçka origjinale. Brigjet, plazhet bosh, çmimet e ulëta. Ushqimi është vendas, ndonjëherë vjen e nga kopshtet e tyre.”, nis artikulli me fjalën e Serge Bunner, drejtorit të “20 Minuten”.
Më tej, Shqipëria përshkruhet si një shtet i ri, i modernizuar, ku numri i turistëve u rrit nga 2014-ta në 2016-ën me nga një milion, deri në 4.7 milion sipas të dhënave të Ministrisë shqiptare të Ekonomisë.
“Vija bregdetare e vendit është më shumë se 350 kilometra të gjatë, me plazhe ranorë dhe shkëmbor në Adriatik dhe Jon, të shtrirë në detin Adriatik dhe atë Jon. Shqipëria do të jetë një alternativë e besueshme për destinacionet e tanishme të mbipopulluara të Spanjës, Greqisë dhe Kroacisë.”, citohet më tej në artikull.
Në përfundim, gazeta zvicerane shkruan se në 2011-ën, Shqipëria renditej në “Top Destination”, ndërsa në 2016-ën, ishulli i Sazanit cilësohej si një nga destinacionet kryesore. “Regjimi komunist në Shqipëri ka ndërtuar një bunker anti-atomik, ku tani shqiptarët po diskutojnë që të mund ta ripërdorin për turizmin.”, përmbyllet artikulli.
(XH.A/SHUPLAKA)
Discussion about this post