Ish-zëvendësministrja e Jashtme, Edit Harxhi, duke folur për diplomacinë shqiptare dhe lidhjes së saj të ngushtë me problematika të rajonit të Ballkanit ka thënë se Shqipëria nuk e ka luksin që diplomacinë ta bëjë në Facebook apo Twitter.
“Shqipëria nuk e ka luksin për një diplomaci në Twitter apo në Facebook, mundet që këtë ta bëjë Trump në Amerikë por jo ne në Shqipëri” tha ajo.
Sipas Harxhit, Tirana zyrtare duhet të ketë shumë kujdes me marrëdhëniet me fqinjët pasi Shqipëria është një qendër nga ku lëvizjet e saj reflektohen shpejt në shtetet kufitare me popullsi shqiptare.
“Do të ishte shumë më mirë që Tirana zyrare të kishte më shumë kujdes në marrëdhëniet me Greqinë apo Serbinë. Shqipëria është një vend që mund të emetojë krizë në vendet e rajonit. Kjo për shembull nuk ndodh me Maqedoninë apo ndonjë vend tjetër specifik. Në Shqipëri, kushdo që të jetë në qeveri duhet të jetë i kujdesshëm në politikën e jashtme. Ne nuk prodhojmë asgjë të rëndësishme, ajo që mund të prodhojmë ne është një politikë e jashtme e matur.
Kriza aktuale sipas Harxhit në Ballkan nuk vjen rishtazi. Sipas saj në momente zgjedhjesh këto pasiguri përdoren nga faktorë të tretë jo rajonalë duke iu referuar veëanërisht Malit të Zi dhe Maqedonisë.
(M.D/ Shuplaka)
