‘’Shqipëriaqëduam.al” arrin ‘’suksesin” e parë. SHKARKOHEN 3 zyrtarë të hipotekave

‘’Shqipëriaqëduam.al”, website i promovuar nga ana e qeverisë duket se i ka arritur sukseset e para.  

Ministrja e Drejtësisë, Etilda Gjonaj, ka njoftuar sot në një deklaratë për mediat shkarkimin e 1 juristi dhe 2 specialistëve  të Hipotekave në Tiranë e Fier. Sipas ministres shkarkimi i tyre është bërë pas denoncimeve të qytetarëve në “shqipëriaqëduam.al”.

Më tej nuk jepen detaje në lidhje me mënyrën sesi është bërë verifikimi i shkeljeve nga ana e zyrtarëve të hipotekave.

“Rasti i parë i referohet një qytetareje nga Fieri, që ka paraqitur ankesën e saj, ajo i ka shlyer detyrimet për vlerësim të pronës së saj, por nuk i është dhënë përgjigje. Në këtë mënyrë përjashtohet juristi Myrto nga zyra rajonale Fier,” tha ministrja.

Etilda Gjonaj gjithashtu tregoi rastin e aplikimit të një tjetër zonje në shtator të këtij viti, dhe deri në nëntor dokumentat kishin ngelur aty.

“Një qytetare nga Tirana që ka paraqitur ankesë te Shqipëria që duam, ka aplikuar te zyra rajonale Tiranë dhe dokumentet kishin ngelur për fime pranë drejtorive perkatese. Jane marë masa për regjistirmin e kontratës së shitblerjes. Duke i kërkuar ndjesë për vonesat e pajustifikueshme qytetares, kam kerkuar përjashtim të dy specialistëve Salku dhe Ismaili,” tha ajo.

(E.K/Faxweb)