“Shqiponja”, ministri grek: 5 vite burg për ushtarët. Çdo shqiptar që nuk ndihet grek të kthehet në vendlindje

Panos Kamenos, ministri i Mbrojtjes në Greqi,ka kërkuar dënimin maksimal për 7 ushtarët grekë me origjinë shqiptare.

Ai është treguar i ashpër duke kërkuar që ushtarët të dënohen me 5 vite burg nën akuzën e ringjalljes së nacionalizmit shqiptar.

“Ky është një projekt në vazhdim të nacionalizmit shqiptar. Ushtarët të dënohen me 5 vite burg. Çdo shqiptar që nuk ndihet grek, të kthehet në vendlindje.

Kam kërkuar marrjen e masave disiplinore, administrative dhe kriminale për përgjegjësit”, tha ministri duke folur për televizionet greke. Është diçka e krijuar nga nacionalistët shqiptarë për të dëmtuar marrëdhëniet me Greqinë. Një fenomen i tillë është i papranueshëm për Forcat e Armatosura.”, mësohet të ketë thënë ministri grek Kamenos.

Këtë deklaratë, ai e bëri për mediat vendase në Greqi, pas kthimit nga Shtetet e Bashkuara të Amerikës, ku thuhet se ishte i pranishëm në ceremoninë e inaugurimit të Trumpit.

Ushtarët grekë me origjinë shqiptare u fotografuan brenda një reparti ushtarak në Mesologji të Greqisë teksa bënin gjestin e shqiponjës dy krenare. (XH.A/SHUPLAKA)