Raporti më i fundit i Departamentit Amerikan të Shtetit që ndalet për situatën në Serbi ndër të tjera, ngre shqetësimin për respektimin e të Drejtave të Njeriut dhe diskriminimin e pakicave etnike. Në raport janë shprehur vërejtjet konkretisht për diskriminimin e shqiptarëve në Luginën e Preshevës.
Në seksionin nr. 6 të raportit të DASH-it ku bëhet fjalë për diskriminimin e minoriteteve në Serbi, ndër të tjera citohet:
“Liderët etnikë shqiptarë në komunat jugore të Preshevës, Medvegjës dhe Bujanocit u ankuan se ishin pak të përfaqësuar në institucionet shtetërore në nivel lokal. Shqiptarët etnik nuk posedojnë tekste të mjaftueshme në gjuhën shqipe për arsimin e mesëm sipas marrëveshjes më 9 majit mes Preshevës dhe Beogradit.”
Në raport bëhet me dije se është vënë re nga vëzhgues të shumtë ekzistenca e një klime armiqësie ndaj pjesëtarëve të pakicave kombëtare dhe etnike si dhe raportohet diskriminimi në lidhje me punën dhe profesionin.
Sipas të dhënave të regjistrimit, 21 grupe të ndryshme etnike kanë jetuar në vend. Liderët etnikë shqiptarë në komunat jugore të Preshevës, Medvegjës dhe Bujanocit dhe boshnjakëve në rajonin jugperëndimor të Sanxhakut kanë shprehur ankesat se ishin pak të përfaqësuara në institucionet shtetërore në nivel lokal, thuhet në raportin e DASH-it.
(XH.A/SHUPLAKA)
Discussion about this post