“Askush më shumë se kjo fotografi e realizuar më 4 maj të vitit 1913 në Prishtinë, nuk dëshmon për mjerimin tonë. Shqiptarë të leckosur dhe të uritur, janë të “shoqëruar” edhe nga dy xhandarë serbë, të cilët janë dëshmia më e mirë e kërcënimit të radhës”, kështu ka shkruajtur ish-gazetari Bajram Mjeku në rrjetet sociale përkrah fotografisë së mëposhtme.
Mjeku ka publikuar një fotografi që shpërfaq mjerimin e shqiptarëve, e që thotë se është realizuar më 4 maj 1913 në Prishtinë. Aty shihen disa shqiptarë “të uritur e leckosur”, ndërsa në afërsi të tyre qëndrojnë edhe dy xhandarë serbë.
Mjeku ka thënë se fotografia mund të jetë realizuar në Qarshinë e Prishtinës, aty ku sot janë objektet e Kuvendit dhe Qeverisë së Kosovës.
Sipas Mjekut, kjo fotografi është realizuar nga bankieri francez dhe filantropi Albert Kahn, i cili e kishte vizituar Kosovën në maj të vitit 1913.
Në koleksionin e filantropit Albert Kahn, gjenden 94 fotografi me motive nga Kosova. Kahn veç Prishtinës, vizitoi edhe Prizrenin, Graçanicën e Lypjanin.
Fotografia është realizuar sipas sistemit të parë fotografik në botë me përdorim të thjeshtëzuar, i cili në atë kohë quhej “true color”
(F.GJ/FAXWEB.AL)
