Shqiptarët në Ankona të Italisë hapin një shkollë në gjuhën shqipe. Shkolla shqipe është hapur nga komuniteti shqiptar i fondacionit “Mirdita” na Marche të Ankonas.
Deri më tani janë rregjistruar 24 nxënës, të cilët mësojnë gjuhën amëtare, historinë dhe kulturën e Shqipërisë.
Mësuesit janë vullnetarë dhe nuk paguhen për të dhënë mësim. Komuniteti shqiptar vendosi që ta ngrejë këtë shkollë, me qëllim që të vegjlit most a harrojnë gjuhën shqipe.
Drejtuesi i fondacionit Selman Dermyshi, me origjinë nga Rrësheni, tregon për “Ora Neës” se kanë probleme me literaturën.
“Përsa i përket gjuhës shqipe kjo ka ardhur në rritje, numri i nxënësve. Fillimisht e kemi krijuar me 5-6 nxënës tani kemi arritur deri në 24 fëmijë. Por ka pasur edhe probleme për shkak të literaturës.”, thotë Dermyshi.
Sipas avokatit Arjol Kondi, i cili që prej vitesh asiston problemet dhe hallet e emigrantëve shqiptarë në rajonin e Marche-s, duhet të jetë shteti shqiptar ai që duhet të kontribuojë për këtë pjesë.
“Nëse shteti shqiptar do ishte në gjendje që të jepete një ndihmë ekonomike për këta mësues që deri në sot e kanë bërë punën në mënyrë të përkryer, por në mënyrë vullnetare, nëse do kishte një mbështetje financiare nga autoritetet shqiptare niveli do ishte lartë dhe mund të arrihej që të bëheshin shkolla të mirëfillta shqipe.”, thotë Kondi. (D.D/Shuplaka)
Discussion about this post