“Shqiptarët nuk do të hanë me lugë të argjendtë”, Kryemadhi nga SHBA: Kriza ka ardhur nga klasa politike

Monika Kryemadhi ndodhet në SHBA për të marrë pjesë në Forumin e ish-kongresmenëve dhe ish-senatorëve, ku ka zhvilluar disa takime me kongresmenë, ish-kongresmenë, senatorë dhe ish-senatorë, me të cilët ka folur për situatën aktuale politike në Shqipëri dhe në rajon.

Në një intervistë për tv Nova ajo ka thënë se do të zhvillojë disa takime konsultative me institucione partnere të LSI-së. Gjithashtu ka pranuar se përgjegjësi për krizën ka gjithë klasa politike

“Nuk është më një situatë ku jemi në normalitet, kemi një Shqipëri e cila lëngon nga problematika shumë të mëdha, ku për hir të së vërtetës shkaktarë të këtyre problematikave jemi vetë ne klasa politike, duke përfshirë dhe veten time si përgjegjëse të kësaj situate, por pavarësisht nga kjo mendoj që më mirë vonë se sa kurrë, ne të gjithë duhet të reagojmë për të nxjerrë vendin nga kriza”, tha Kryetarja e LSI-së.

Ndër të tjera Kryemadhi u shpreh se nuk e di aspak nëse do të vijë apo jo në pushtet opozita por dhe nëse ndodh kjo e fundit , shqiptarët nuk do të hanë me lugë të ardhendtë.

“Nuk duhet të themi që edhe po të vijë kjo opozitë në pushtet do hamë me lugë të argjendtë…

Nuk e dimë a do të vijë kjo opozitë në pushtet. Ne po themi të shkojmë në zgjedhje të lira dhe të ndershme dhe më pas janë shqiptarët. Për hir të së vërtetës po të shikojmë historikun e shumë gjërave, do shikojmë që ekonomia ka qenë më e mirë. Po themi që nga largimi i LSI-së nga qeverisja me zotin Rama do të shikoni që vendet e Shqipërisë kanë shkuar shumë shumë më poshtë, gati me vendet e Afrikës për sa i përket korrupsionit, për sa i përket shpërdorimit të parave publike e të tjera. Pavarësisht se njerëzve u është krijuar koncepti që për këtë ka qenë fajtore LSI-ja. Por në fakt doli dhe ka rezultuar, dhe nuk janë as analizat dhe sondazhet tona, por janë analizat e institucioneve ndërkombëtare, qofshin këto nga Banka Botërore, Transparency International e shumë e shumë të tjera të cilat janë ato që kanë treguar rënien drastike të vendeve të Shqipërisë për sa i përket kualifikimeve.”– tha Monika Kryemadhi.