“Shqiptarët të tjera gjëra studiojnë, të tjera punë bëjnë”. Cilat janë fushat që pritet të kenë mbifurnizim të të diplomuarve

Një studim i detajuar i Komisionit Europian nxjerr në pahë realitetin shqiptar, se vendi ynë ka numër të lartë të diplomuarish, por papunësia në këto kategori është gjithashtu e lartë.

Në analizën “Nga universiteti te punësimi” përmes anketimeve janë marrë në analizë institucionet e arsimit të lartë si dhe nevojat e tregut në vendet e Ballkanit Perëndimor, përfshi këtu edhe Shqipërinë.

Lidhur me Shqipërinë sa i përket vështirësive që hasin të sapodiplomuarit në gjetjen e një pune, studimi tregon se ndryshe nga sa ndodh në vendet e tjera të rajonit, diploma nuk iu ofron ‘mbrojtje’ ndaj papunësisë.

Një tjetër tregues i gjendjes problematike është se shkalla e të diplomuarve të punësuar në Shqipëri është 18 pikë përqindjeje më poshtë se në BE.

Ndërsa në kategori të ndryshme të të diplomuarve kjo normë mund të shkojë deri në 28%.

“Përveç kësaj, sondazhi diplomuar tregon se shkalla e papunësisë të të diplomuarve të fundit është 28%, shumë më lartë se shkalla e papunësisë së fuqisë punëtore në tërësi dhe më lart se për të gjithë të diplomuarit. Shkalla e punësimit e të sapodiplomuarve është 54%, më e ulët se norma e punësimit të të gjithë të diplomuarve. Kjo pasqyron vështirësinë që hasin të diplomuarit teksa përballen me tregun e punës në vitet menjëherë pas diplomimit nga universiteti. Por, me kalimin e kohës me rritjen në karrierë gjetja e punës bëhet më e lehtë”, thuhet në këtë studim, përcjell “Monitor”.

Analiza e KE-së vë në dukje se pavarësisht rritjes ekonomike që ka vazhduar, norma e papunësisë është rritur. Në vitin 2013, shkalla e papunësisë tek të diplomuarit ishte nën normën e përgjithshme e papunësisë, por që nga ajo kohë është rritur. Në vitin 2015 shkalla e papunësisë tek të diplomuarit ishte mbi normën e përgjithshme të papunësisë.

Në analizë flitet se në Shqipëri do të ketë një mbi furnizmim të të diplomuarve që i përkasin fushave të tilla si: Arsimi, Artet dhe Shkencat Humane, Administratim biznesi, Drejtësi dhe Shëndetësi.  Ndërsa suficiti më i madh do të jetë sa i përket punonjësve të shëndetësisë që do të kenë tendencë që të largohen jashtë vendit.

(XH.A/SHUPLAKA)