Shtëpia e At Gjergj Fishtës është drejt rrënimit, dhe nga autoritetet nuk është marrë asnjë masë për ta parandaluar këtë fenomen.
Gazetari i Fax News Martin Marku ka qenë paraditen e sotme në këtë shtëpi, e cila ndodhet në zonën e Zadrimës, ku duket se shembja mund të jetë çështje muajsh.
Në ambientet e brendshme gjithçka është e pluhurosur dhe e shkatërruar, ndërsa muret tashmë kanë marrë lagështirë. Kjo shtëpi është shpallur dhe monument kulture në vitin 2008, ndërsa nga Ministria e Kulturës nuk është marrë asnjë masë për rikonstruksionin e saj.
Pavarësisht se numri i turistëve që shprehin dëshirën për ta vizituar këtë monument kulture është i lartë, pamja dhe gjendja e saj është në kushte skandaloze. Dera e jashtme e kësaj shtëpie është e hapur, dhe mund të jetë pre dhe e akteve të vandalizmit nga persona të ndryshëm.
Nga ana tjetër situate bëhet edhe më e vështirë, për shkak se kësaj prone i kanë dalë edhe pronarët, të cilët kanë pretendimet e tyre, dhe nuk dihet se cili do të jetë vizioni që ata do të kenë për këtë godinë. prej 20 vitesh kjo banesë është e pabanuar, ndërsa në ambientet e jashtme qëndron dhe një bust i Homerit të letrave shqiptare.
(E.K/FAXWEB.AL)
Discussion about this post