Një zyrtare e lartë e Koresë së Veriut tha se zëvendëspresidenti amerikan, Mike Pence “është idiot”, ndërsa paralajmëroi me një shfaqje të mundshme bërthamore nëse diplomacia dështon.
Choe Son-hui tha se Peniani nuk do të lutet për dialog me SHBA-në dhe as do të përpiqet që të bindë Uashingtonin të marrë pjesë në bisedime. Gjatë ditëve të fundit, të dyja palët kanë paralajmëruar se takimi i 12 qershorit mes Donald Trump dhe Kim Jong-un mund të shtyhet, madje edhe të anulohet.
Koreja e Veriut thotë se nuk do të shkojë në takim nëse SHBA-ja këmbëngul në çarmatosjen e njënashme bërthamore, ndërsa në krahun tjetër, Donald Trump tha se është Koreja e Veriut ajo që duhet të plotësojë kushte për bisedimet.
Në një artikull për mediat shtetërore në Korenë e Veriut, Choe Son-hui shkruan se zëvendëspresidenti Mike Pence bëri komente të pakujdesshme, sidomos kur krahasoi Korenë me Libinë. Ajo e cilësoi Pence “një idiot politik që krahason një shtet bërthamor me Libinë, që thjesht kishte instaluar disa pajisje dhe luante me to”.
“Jam kaq e habitur që një person i përfshirë thellë në çështjet amerikane si zëvendëspresidenti shfaq një injorancë kaq të madhe dhe bën komente kaq idiote”, deklaroi Choe Son-hui, e cila shtoi se nëse SHBA do të takohet me Korenë e Veriut në një sallë apo në një shfaqje bërthamore, kjo varet nga vendimet dhe sjellja e Uashingtonit.
