Me nisjen e vitit të ri, asgjë nuk ka ndryshuar sa i përket një dukurie shqetësuese në shoqërinë tonë. Dhuna në familje paraqitet në shifra shqetësuese pavarësisht përpjekjeve për ta parandaluar.
Vetëm në kryeqytet, janë lëshuar së fundmi tri urdhëra mbrojtje ndaj një gruaje dhe dy vajzave të reja në moshë.
Policia e Tiranës ka lëshuar urdhër mbrojtje ndaj shtetases me iniciale K. T, e cila është dhunuar nga i biri Gazmend T. 30 vjeç, i cili është vënë në prangat e policisë.
Urdhri i mbrojtjes së menjëhershme është plotësuar edhe për dy vajza J. M. dhe E. M. që janë dhunuar fizikisht dhe psikologjikisht nga babai i tyre Adrian M. 47 vjeç.
Në një konferencë për shtyp në fillim të këtij viti, ministri i Brendshëm, Saimir Tahiri, premtoi se luftimi i dukurisë së dhunës në familje do të jetë prioritet i Policisë së Shtetit në 2017-ën.
“Sa i përket dhunës në familje, jemi ende në fazën e zbulimit të këtij problem real në shoqërinë tonë. Gjatë vitit të kaluar janë proceduar mbi 3 mijë e 45 autorë, gati 1 mijë të arrestuar. Afërsisht 3 qytetarë të arrestuar në ditë për dhunë në familje.”, shprehej Tahiri.
Përballë premtimit për marrjen e masave konkrete, kjo dukuri vijon të mbetet një realitet i hidhur ku gëlojnë lajmet e vrasjeve dhe urdhëra-mbrojtjesh të dështuara. Më i përfoluri së fundmi ishte ngjarja tragjike e shënuar në fund të 2016-ës në Fier, ku një shtetas zhveshi dhe hodhi nga dritarja e banesës bashkëshorten e tij Liliana Rukaj. (XH.A/SHUPLAKA)
