Një atentat me armë zjarri iu bë dje biznesmenit Dashamir Gjoka në Shijak teksa ishte duke udhëtuar me makinën e tij, me 3 vajzat dhe bashkëshorten. Drejt makinës që tij u zbrazën 26 plumba por asnjë të lënduar nuk pati pasi makina ishte e blinduar.
Ndërkaq, burime pranë policisë bënë me dije se në momentin që drejt mjetit të Gjokës është qëlluar me armë, ky i fundit nuk ka ndaluar por ka shtuar shpejtësinë për t’u shpëtuar plumbave të agresorëve.
Pas plumbave Gjoka ka shkuar drejt dhe në komisariat dhe nuk ka pritur që uniformat blu të mbërrinin në vendngjarje.
Sipas “Gazeta Shqiptare” Gjoka ka deklaruar se u qëllua nga një automjet që ecte paralelisht me të, teksa ishte duke udhëtuar në drejtim të Shijakut.
Biznesmeni u ka treguar oficerëve të policisë se nuk ka arritur të dallonte armën e zjarrit me të cilën u qëllua apo se kush mund të ndodhej brenda në makinë, pasi sapo ka dëgjuar të shtënat, ka tentuar të shtojë shpejtësinë e mjetit për t’u larguar sa më parë që aty.
(J.V/Shuplaka)
