Mundësia e shtyrjes së zgjedhjeve parlamentare të qershorit është një nga retorikat e përdorura në media ditët e fundit nga disa eksponentë politikë. Këtë ide do ta hidhte si fillim deputeti demokrat Edi Paloka. Duke folur për Reformën Zgjedhore dhe hapat paar të munguara ai u shpreh ndër të tjera se nëse është e nevojshme zgjdhjet duhet të shtyhen.
‘’Teknologjia mund të përdoret në zgjedhjet e ardhshme nëse ka vullnet politik, por Rama nuk e ka. Nuk është diskutuar në PD, por nëse duhet periudhë më e gjatë për votim dhe numërim elektronik, zgjedhjet mund të shtyhen. Ky është mendimi im”, ka deklaruar Paloka.
Ndërkohë nga ana tjetër Partia Socialiste i ka konsideruar qesharake dhe reflektim i frikërave të brendshme kërcënimet e përsëritura të Partisë Demokratike, e cila ka paralajmëruar se ’97 do të duket lule nëse ajo do të humbasë zgjedhjet e ardhshme parlamentare.
Deputeti socialist, Arben Çuko, mendon se kërcënimet e Partisë Demokratike për destabilizimin e vendit nuk duhen marrë seriozisht, ndërsa ka shtuar se opozitës dhe Sali Berishës tashmë u kanë rënë dhëmbët.
Sipas tij, kërcënimet reflektojnë frikën e opozitës shqiptare nga humbja në zgjedhjet e 18 Qershorit 2017.
Ndërsa deputeti socialit Pjerin Ndreu është shprehur se nëse ka një forcë politike që ka kulturën e vjedhjes së votave, ajo është Partia Demokratike. Ndreu u shpreh i bindur se e majta do të fitojë zgjedhjet parlamentare të 18 Qershorit. Sipas deputetëve socialistë kërcënimet paralajmërojnë humbjen e PD në zgjedhjet e ardhshme parlamentare. (E.K/SHUPLAKA)
