Shullazi përballë biznesmenit Beqja tek Krimet e Rënda, japin dorëheqjen avokatët e Gilmando Danit

Është bërë i mundur sot ballafiqimi i Emiljano Shullazit me biznesmenin Ylvi Beqja, dëshmitarin e penduar të çështjes.

Në këtë seancë gjyqësore ishin të pranishëm edhe të pandehur të tjerë, të cilët Beqja i ka denoncuar se e kanë kërcënuar dhe i kanë vënë gjobë.

Në fillimit të seancës, avokatët e Shullazit dhe të panderhurve të tjerë Gilmando Dani, Blerim Shullazi, Endrit Qyqja, dhe Endri Zela, kërkuan përjashtimin e gjyqtares së çështjes me pretendimin se i ka sorollatur.

Mësohet se gjatë seancës, avokatët e Gilmando Danit kanë dhënë dorëheqjen nga mbrojtja. Ata e kanë cilësuar si të paligjshme dëshminë e Ylvi Beqja si bashkëpunëtor i drejtësisë. Ata u larguan nga salla në momentin kur do bëhej sigurimi provë.

Në muajin tetor biznesmeni Beqja pranoi të bashkëpunonte me akuzën. Sipas Krimeve të Rënda, Ylvi Beqja ka deklaruar se Emiljano Shullazi, përmes bashkëpunëtorëve të tij, në tri episode i ka vendosur gjoba që janë aplikuar në formën e çeqeve, në emër të Endrit Zelës dhe Endrit Qyqes, të dy këta të arrestuar pas një takimi në paraburgim me Shullazin. (XH.A/SHUPLAKA)