Ministrja e Arsimit, Lindita Nikolla, do i drejtohet Prokurorisë së Krimeve të Rënda, e thirrur për të dhënë shpjegime lidhur me dosjen e Emiljano Shullazit.
Mësohet se menjëherë pas ish-ministrit Saimir Tahiri, do të jetë ajo që do të dëshmojë sa i përket çështjes “Shullazi”, konkretisht kërcënimin e bërë ndaj rektorit të Universitetit të Tiranës, Mynyr Koni, një vit më parë.
Arsyeja pse ajo është thirrur në gjyq, është dijenia e saj mbi kërcënimin dhe prezenca e saj në një takim të zhvilluar me Mynyr Konin.
Dy zyrtarët e lartë po merren në pyetje për ngjarjen e kërcënimit të Konit në prill të 2016-ës, kohë kur ai garonte për kreun e Rektoratit, kur u kërcënua nga disa persona në emrin e Emiljano Shullazit.
Menjëherë pas kërcënimit, Mynyr Koni zhvilloi një takim me drejtorin e Policisë së Tiranës, Ervin Hodaj, i cili i komunikoi situatën ministrit të Brendshëm në atë kohë, Saimir Tahirit. Ish-ministri zhvilloi një takim me Konin dhe Hodaj, ku ishte e pranishme edhe ministrja e Arsimit, Lindita Nikolla.
(XH.A/SHUPLAKA)
