Nga Edison Ypi
Të dy me shkollë të lartë. Të dy me smartfona. Të dy me email me pasuord që nuk e zbërthen dot as CIA. U njohën gjatë ceremonisë së promovimit të një libri të keq. Ai u mahnit pas saj nga mënyra se si ajo tundte flokët. Ajo u magjeps pas njohurive të tij në fushën e Letërsisë kur ai i tha; “shum’ nice ky libri” dhe ajo ja ktheu: “goxha cool ky autori”. U takuan disa herë. Zbuluan binjakërinë e shpirtrave. Vendosën të fejohen. Pas një viti u martuan. Ndër këngët që u kënduan në dasëm la mbresa të thella “Ristana”, veçanërisht vargu lotëndjellës; “S’pata pare me të majte”. Dikujt që e mori dhëndrin në fotografi duke teshtitur, dhëndëri i tha me ironi: Pasi më more duke teshtitur nga përpara, tani më merr edhe nga pas duke kënduar. Plasi gazi.
Një çakërrqef nxorri nga brezi një kobure dhe u bë gati ta çponte tavanin. Dy që qenë më esëll arritën t’ja heqin koburen nga duart adhuruesit të Traditës vetëm pasi e bindën se kishte ngatërruar shekullin. Dasma po shkonte për bukuri. Kur befas, në një moment u vunë re disa lëvizje nervoze të dhëndërit. Dhëndëri vej-e-vijke me një celular në dorë si i tërbuar. Me gjasa në ekranin e atij celulari duhej të kishte diçka tmerruese. Pas kësaj, dasma nisi t’i ngjante një zjarri shkarpash që shndrrohen në hi.
Në fillim mbyturazi, pastaj me zë më të plotë dasmorët nisën të pyesnin të habitur; ç‘ka ndodhur, ç‘po bën vaki ?! Shpejt u muar vesh se njohjen e beftë, shpirtrat binjakë, dashurinë e zjarrtë, fejesën e ëmbël, dasmën dhe martesën e shumpritur, i kishte marrë lumi. Ai dhe ajo nuk do martoheshin, nuk do bëheshin burr’ e grua, nuk do pillnin bastarda. Pse-pse-pse? pyesnin të gjithë të habitur. Disa të ftuar ja plasën të qarit. Vazhdoi kjo gjendje me pëshpërima, psherëtima, piskama, ku dihej pasoja por jo shkaku, derisa doli një kunat i dhëndërrit që i dha drejtim muhabetit.
Kunati tha: Na vjen keq që i braktisët tavolinat e të ngrënave si arena luftrash të humbura. Ishte e paimagjinueshme të ndodhte një hata e tillë me një dhëndërr sa trendy edhe tradicional si kunati im. Por faktet janë kokëforta. Gjithçka është e dëshmuar me një foto që u bë me celular nga një shok për kok dhe mik besnik i dhëndërrit. E vërteta e hidhur është se në foton fatale që u bë sebep për këtë divorc është fiksuar momenti kur gjatë një vallëzimi rock nuses ju dukën brekët.
(XH.A/SHUPLAKA)
