Kryetarja e LSI-së, Monika Kryemadhi në një takim me strukturat e kësaj parite në njësinë bashkiake nr. 11 në Tiranë, i ftoi gjithë shqiptarët në protestën e nesërme të opozitës. Ndryshe nga herët e tjera Kryemadhi i ka ftuar protestuesit të shmangin aktet e dhunës dhe çdo provokim tjetër.
“Nesër t’i themi boll regjimit diktatorial. Është një nga protestat më të mëdha. Edhe pse është muaji i Ramazanit dhe shumë shqiptarët agjërojnë ua bëftë dritë dhe të na i falë mëkatet. Do tregojmë çdo gjë që ka të bëjë me të ardhmen e fëmijëve tanë, do jemi në ballë të çdo proteste. Beteja jonë është e ardhmja e fëmijëve shqiptarë, që të hapim negociatat me BE. Nesër mos ndaloni, i bëj thirrje gjithë Shqipërisë, protestat tona paqësore janë protestat që do sjellin ndryshimin. Ju bëj thirrje të distancoheni nga dhuna edhe pse njerëzve ju ka ardhur aty ku nuk mban më. Detyra jonë është të rrëzojmë sistemin, jo të sulmojmë godinat”,– tha Kryemadhi.
Ajo tha se nesër opozita do protestojë bashkë me policët. “Policët që kemi përballë t’i konsiderojmë si vëllezërit tanë”,- vijoi Kryemadhi.
Ndërkohë që nesër pritet të zhvillohet protesta e gjashtë kombëtare e opozitës duke u pretenduar kështu nga udhëheqësit të jetë goditja finale.
