Tani që u miratua në Këshillin Bashkiak Plani Urbanistik për Tiranën, zbardhen dhe detaje për mënyrën si do ndryshojë kryeqyteti.
Plani i përgjithshëm vendor, sipas kryebashkiakut Erion Veliaj, do ta përcaktojë Tiranën si një hapësirë europiane.
“Do zgjerojmë me 25 mijë metra Parkun e Liqenit. Tirana policentrike është vlerësuar nga mbi 80% e qytetarëve. Në janar ftoj Këshillin Bashkiak të bëjë një xhiro e të shohë kur të nisë shtrimi me pllaka i zgjatimit të bulevardit”, ka thënë mes të tjerash gjatë mbledhjes së këshillit Veliaj.
Sipas parashikimeve popullsia e Tiranës do të jetë 1 milion e 150 mijë në 15 vitet e ardhshme dhe ekspertët mbështetës së këtij plani thonë se teknikisht ky plan do përballojë zgjerimin.
Në planin e ri do të parashikohet inventarizimi i tokës, gjenerimi i investimeve të infrastrukturës e shërbimeve publike në investimin privat, si dhe do bëhet ç’është e mundur për t’u ngritur në lartësi me qëllim që të çlirohen hapësirat publike.
Sipas ekspertëve mbështetës së planit do të mbrohen territoret natyrore e bujqësore. Sipas një gazete të përditshme parashikohet vëmendje e madhe te: Pylli Orbital, Oazët natyrorë, Parku botëror, Unaza II dhe IV, Unazat e gjelbra dhe blu, Tirana policentrike, Shkollat e hapura, Ruajtja e pasurisë arkitektonike, Transporti, Sistem i ri bujqësor tregtar për fermerët, Rrjeti i korsive, Aksesimi i kryeqytetit dhe Energjia e rinovueshme. (V.G/SHUPLAKA)
Discussion about this post