Atleti Izmir Smajlaj u shpall kampion Evrope në garën e kërcimit së gjati në Kampionatin Evropian të Atletikës që u mbajt në Beograd. Ai arriti t’i befasonte të gjithë me kërcimin e tij 8.08 metra.
Pas fitores, Smajlaj në mënyrë simbolike bëri me duar shqiponjën, dhe kjo shkaktoi në mënyrë të menjëhershme reagim te mediat serbe.
“Shqiptari Izmir Smajlaj çuditërisht mori medaljen e artë në kërcim së gjati në Kampionatin Evropian në Beograd, ndërsa më vonë i paprovokuar provokoi publikën korrekt në “Arena” e cila e përshëndeti atë me duartrokitje”, shkruan portali serb “Vesti-online”.
“Kur u bë e qartë se fitoi çmimin e parë për kërcimin e tij prej 8.08 metra, ai bëri me duar shqiponjën dykrenore (përshëndetje karakteristike e shqiptarëve) dhe ka bërë me gisht kah fanella e tij ku shkruante Shqipëria”, shkruan më tej ky medium.
“Çfarë të thuhet? Komplekset janë të pashërueshme”, ka shkruar “Vesti-online”.
Me tone të ngjashme ka raportuar edhe portal tjetër serb, “Blic”.
“Organizimi i mrekullueshëm i Evropianit në atletikë nuk ka mundur të kalojë pa incidente të cilat i ka nxitur shqiptari Izmir Smajlaj, rrjedhimisht fitues i garës në kërcim së gjati”, shkruan ky portal.
“Smajlaj ka mundur ta përshëndes publikun, por ai në vend të kësaj, me duar ka bërë shqiponjën dykrenore që është simbol i Shqipërisë, dhe duke treguar kah fanella e tij ku shkruante emri i vendit nga vjen ai”, ka shtuar “Blic”.
Më tej, ky portal thotë se megjithëse e fitoi çmimin e parë, “suksesin e prishi me këtë gjest të panevojshëm”.
Si duket, në Serbi ende nuk janë pajtuar me atë incidentin e 14 tetorit, 2014 kur flamuri me mbishkrimin “Autochthonous” dhe me hartën e trojeve etnike shqiptare valoi mbi stadiumin në Beograd në kohën kur po luhej ndeshja Serbi – Shqipëri.
Discussion about this post