Përplasje në Kuvend, deputeti i PD-së Noka i afrohet Ramës ndërsa kryeministri ka përsëritur pa rreshtur: Nga kush pyll e keni sjellë këtë?!
Pas kësaj deputeti i Partisë Demokratike Flamur Noka përjashtohet nga Kuvendi për ditën e sotme.
Kryeparlamentari Ruçi i tërhoqi vëmendjen pesë herë rresht, por Noka vijoi të replikojë i ngritur në këmbë në foltoren ku fliste kryeministri Edi Rama.
Po ç’i tha Rama Berish që nxehu Flamur Nokën. Rama e quajti Berishën ‘llaxore’, një term popullor i përafërt me fjalën thashethemaxhi. Pikërisht ky term acaroi deputetët e opozitës e më pas Noka iu afrua foltores për të ndërprerë Ramën.
“Sali mos kini asnjë merak, të gjitha do shkojnë në vendin e vet. Haka do shkojë tek i zoti. Është e padiskutueshme që këtu do jem edhe unë, edhe ti edhe Lulzimi edhe kushdo tjetër. Këtu do jemi Sali, besoje këtë gjë. Këtu do jemi dhe do shikojmë. Është një luftë që zhvillohet nga organet ligjzbatuese në bashkëpunim të ngushtë me agjenci të superspecializuara që janë në punë Sali. Janë në punë çdo ditë dhe shumë shpejt shqiptarët do të shohin edhe çfarë do t’u sjellë reforma në drejtësi, edhe çfarë do t’u sjellë vettingu, edhe çfarë do t’i sjellë operacioni Forca e ligjit dhe investimi në votën e 25 qershorit. Kurrë nuk kam bërë dhe nuk bëj politikë me emra kriminelësh dhe emra krushqsh. Këtë e ke si llaxorja e këtij vendi”, tha Rama.
Pas pushimit 5 minutësh dhe përjashtimit të Nokës, Rama shpjegoi sërish epitetin për Berishën.
“Çfarë thashë unë. Llaxore është kazan dixhital në këtë rast. Çfarë shqetësoheni, çfarë ju prek. Po ju përdoreni”, tha Rama.
E gjithë seanca e sotme është karakterizuar nga replika të forta, teksa kryeministri Rama u është përgjigjur akuzave të opozitës në lidhje me përmbytjet në vend. Duke iu përgjigjur Edmond Spahos ai u shpreh se PD-ja nuk i la asgjë rezervave të shtetit duke marrë edhe orizin dhe groshet që gjendeshin aty.
“Profesor ju jeni nga ata që e dini se sa bëjnë shtatë herë shtatë e megjithatë ju numëroni siç thotë Partia dhe jo siç thotë tabela. E more me britma të mëdha sot dhe shumë gjëra që janë nën nivelin tënd, e përmbyte komplet rrjedhën e logjikës.
Fole këtu sikur sapo zbritët nga një anije kozmike e ardhur nga hëna. Nda unë them përherë që kur ju dëgjon juve pyet: pse sot erdhën këta?! A nuk ishit ju ata që thoni që ndërtimet pa leje janë mrekullia e tetë e botës?! Ju keni qenë këtu KUR Saliu thoshte që ndërtimi pa leje i një qyteti është mrekullia e tetë e botës?! Ndërtimin në lumë e sollët ju, e bëtë Shqipërinë rast unikal.
Vini flisni këtu për ndihma, ju ikët nga pushteti pasi hoqët të gjitha rezervat nga Emergjenca e Shtetit, hoqët groshën dhe orizin e bëtë pilaf për vete. Mirë pilafin dhe groshët e keni ushqim të preferuar, po me çizmet ç’patët. Ne nuk kemi kërkuar ndihma askujt, ne kemi pranuar çdo ndihmë që na është ofruar”, u shpreh Rama.
(E.K/FAXWEB)
Discussion about this post