Sulmuesi i Kombëtares Shqiptare, Armando Sadiku, i cili ka fituar zemrat e të gjithë shqiptarëve me paraqitjet e tij pozitive dhe sidomos në ndeshjen ndaj Izraelit ku shënoi dy gola duket që gënjen hapur kur flet për dedikimin e golave.
Vetëm para tre ditësh, menjëherë pas ndeshjes me Izraelin, ai deklaroi se dy golat e shënuar ua dedikon gjithë shqiptarëve.
Mirëpo futbollisti që u kthye në hero për tifozët shqiptarë kur në “Euro 2016” me golin ndaj Rumanisë, duket se ka ndryshuar qëndrim vetëm brenda 3 ditësh.
Në spotin e ri të shfaqur nga Kryeministri Rama, Sadiku thotë se golat e ndeshjes ndaj Izraelit ia dedikon Edi Ramës, sepse sipas tij, ai është njeriu që ka bërë më shumë për sportin gjatë këtyre viteve.
Tifozët e vërtetë të kombëtares sigurisht që duan të besojnë se Sadiku është treguar i sinqertë tek deklarata e parë, ku dedikimi ishte për të gjithë shqiptarët dhe jo tek e dyta ku Sadiku deklaron se ia dedikon Edi Ramës.
Kjo sepse Kombëtarja për tifozët është më e rëndësishme se gjithçka dhe sukseset apo dështimet e saj kalojnë përtej çdo ndarje politike.
Mbetet enigmë se çfarë e shtyu sulmuesin kryesor të kombëtares të ndryshonte qëndrim në tre ditë, duke u shkaktuar mbase hatërmbetje tifozëve kuq e zi. (B.H/Shuplaka)
Discussion about this post