Ditën e sotme në mbledhjen që pati me administratorët e Tiranës, kreu i Bashkisë Erion Veliaj u shpreh se ndotja e ajrit në Tiranë është tre herë më e ulët se në vendet e rajonit.
Veliaj tregon historinë, se teksa ishte në zyrë me homologun e Shkupit, ata kishin kryer një matje sesi ishte situata e ndotjes në Tiranë dhe në kryeqytetin maqedonas.
“Shkupi e kishte ndotjen 148 µg/m3, ndërsa ne e kemi në qendër të Tiranës sasinë e ndotjes 54 µg/m3. Ç’ka tregon se ne e kemi vetë në dorë edhe ndotjen, duke shtuar hapësirat e gjelbërta”, u shpreh Veliaj.
Edhe nëse e marrim të mirëqenë atë që thotë kryebashkiaku Veliaj, të gjithë e dimë që zyrat e Bashkisë gjenden në zonën me më pak lëvizje në kryeqytet.
Situata më problematike paraqitet në zona të tjera të Tiranës, si ‘’Zogu i Zi” apo ‘’Rruga e Elbasanit”.
Sjellim në vëmendje se Citizens Channel në datën 8 janar kanë bërë matjet e tyre, ku kanë parë se shifrat e ndotjes kanë kapërcyer ato të normës së lejuar nga BE me plot 8 herë.
“Cilësia e ajrit tek Sheshi Avni Rustemi në orën 18:00 ishte rreth 8 herë më e ndotur se standartet europiane. Vlera e PM10 ishte 207.7 µg/m3 ndërsa vlera e PM2.5 196.1 µg/m3. Sipas Agjencisë Europiane të Mjedisit vlerat e tyre nuk duhet të jenë më të larta se 25 µg/m3. Situata paraqitej më e rëndë në kryqëzimin pranë Rrugës së Elbasanit ku vlera e PM10 në orë 18:13 arrinte vlerë 303.9 µg/m3 dhe PM2.5 263,2 µg/m3”, – thuhet në një video ku tregohen qartë parametrat e matura.
Matja ka vazhduar edhe ditën e djeshme, ku në një nga zonat më të populluara, atë të Myslym Shyrit, parametrat janë më pak se dyfishi i normave të Bashkimit Evropian.
“Cilësia e ajrit në Rrugën e Barrikadave në orën 18:01 të datës 10 janar 2018 ishte pak më shumë se dyshifi i normave europiane. Vlera e PM10 ishte 67 µg/m3 ndërsa vlera e PM2.5 61 µg/m3. Në Rrugën Ded Gjo Luli vlera e PM10 në orën 18:08 arrinte vlerëm 77.6 µg/m3 dhe PM2.5 77.1 µg/m3. Ndërsa në Rrugën Myslym Shyri orën 18:15 e PM10 në orën 18:30 arrinte vlerëm 62.3 µg/m3 dhe PM2.5 55 µg/m3”, – raporton portali investigativ.
Duket se nëse vazhdojmë me këto ritme, pasojat që sjell ndotja e ajrit do të dëmtojnë rëndë shëndetin e qytetarëve.
(E.K/FAXWEB)
