Në lidhje me vrasjen e Devi Kasmit ka dhënë dëshminë e tij dhe shtetasi grek. Efthymiou ka deklaruar në Polici se Aurel Hoxhallarin e ka njohur prej kohësh, po këmbëngul se nuk ka lidhje me vrasjen e Kasmit.
Ai pranon po ashtu se ka qëndruar për disa ditë në shtëpinë e Hoxhallarit në Mëzes. Shtetasi grek do të mbrohet nga ana e avokatit Saimir Visha.
Po ashtu ish-polici grek nuk rezulton të ketë hyrë në Shqipëri përmes sistemit TIMS, çka do të thotë se hyrja e tij është bërë në mënyrë ilegale.
Shtetasi grek ka pranuar më tej se me të arrestuarit e tjerë ai është njohur në shtëpinë e Hoxhallarit.
‘’Nuk kam lidhje me vrasjen e Devi Kasmit. Me Aurel Hoxhallarin jam njohur gjatë kohës që ai ka qenë emigrant në Greqi. Kam ardhur disa herë në Shqipëri dhe e kam takuar. Po ashtu kam qëndruar për disa ditë në shtëpinë e tij në Mëzes”, mësohet të ketë thënë shtetasi grek.
Duhet theksuar se në shtëpinë me qera që kishte marrë shtetasi grek nuk është gjetur asnjë provë që mund ta implikojë me vrasjen e Kasmit.
(E.K/FAXWEB)
