”Escobari i Ballkanit” është tentuar të kapej në Sarandë. Policia e Shtetit ka tentuar të vërë në pranga Klement Balilin, dosja e të cilit ka mbërritur në Prokurorinë Shqiptare nga autoritetet greke, por pa mundur ta finalizojë me sukses operacionin.
Top Channel ka mësuar nga burime konfidenciale, se në fund të muajit tetor, një operacion i zhvilluar për kapjen e tij, nuk ka rezultuar i suksesshëm. Uniformat blu kishin marrë informacion se një mbrëmje Balili do të kalonte me një automjet në Qafën e Gjashtës, në hyrje të qytetit të Sarandës.
Për kapjen e tij, është nisur nga Tirana një grup i forcave të posaçme operacionale të Drejtorisë së Përgjithshme të Policisë, duke shmangur përfshirjen e policisë lokale për shkak të frikës së dekonspirimit të operacionit.
Megjithatë pas ndjekjes dhe ndalimit, brenda automjetit të dyshuar, forcat operacionale nuk kanë gjetur Klemend Balilin, por vetëm 2 persona të afërm të tij. Sipas burimeve, informacioni për lëvizjen e Balilit në këtë aks, rreth 6 javë më parë ka qenë tepër i saktë, por dështimi i ndalimit të tij ka hedhur dyshime për dekonspirim të operacionit pasi ai mund të jetë vënë në dijeni.
Megjithatë për Balilin, dosja e të cilit është 10 mijë faqe, ka informacion se ka tentuar edhe një herë tjetër të kalonte kufirin maqedonas në pikën kufitare të Tushemishtit.
”Vizion+” raporton se në dosje prokurorët grekë kanë shkruar se të dielën e 16 tetorit 2016, 46-vjeçari ka kaluar drejt shtetit maqedonas nëpërmjet pikës kufitare të Tushemishtit, me kartë identiteti të ndryshuar, ndërkohë që është kthyer po atë ditë në mbrëmje në vendlindje.
Balili drejt shtetit maqedonas ka udhëtuar me autobusin e linjës, duke mos tërhequr edhe vëmendjen e autoriteteve kufitare.
Prej 6 muajsh, Balili është shpallur në kërkim dhe akuzohet se trafikonte tonelata drogë drejt Bashkimit Europian për këtë arsye ka edhe një urdhër arresti ndërkombëtar ndaj tij, nga Interpoli.
Discussion about this post