Në muajin maj në Tel Aviv do të mbahet festivali i përvitshëm i Eurovizionit.
Jonida Maliqi do të këndojë natën e dytë të festivalit më 16 maj, këngën “Ktheju tokës” dhe e gjithë vëmendja e shqiptarëve do të jetë aty.
Një pjesë e rëndësishme e performancës është edhe veshja, e cila nuk kalon kurrë pa u komentuar.
Stilisti që ka dizenjuar veshjen që Jonida do mbajë gjatë performacës është Ardi Asllani, i cili ditën e sotme, gjatë një interviste në “Klubin e mëngjesit”, ka zbuluar disa detaje më shumë.
“Veshja e ka marrë tashmë trajtën e saj. Ka elementë metalikë të punuar nga artisti Pirro, i cili ka bërë një punë të shkëlqyer. Elementë të aksesorëve ilirë i kemi marrë dhe i kemi sjellë te veshja e Jonidës”, -është shprehur Ardi.
Stilisti ka shtuar se dëshiron që çdo gjë të jetë perfekte duke qenë se për Jonidën është hera e parë që shkon në Eurovizion.
