“Si ndihem në vendin e 7-të në Tiranë”, flet Berisha

Ish-kryeministri Berisha në një intervistë me gazetarin Lutfi Dervishi dhënë për emisionin ‘Përballë’ në RTSH, ka folur për zhvillimet e politikës në vend. 

I pyetur se si ndihet në vendin e 7-të në listën e Tiranës u shpreh se e shikon këtë pozicion si komod.

Pjesë nga intervista:

DERVISHI: Ndodhemi në mesin e fushatës elektorale dhe janë zgjedhjet e 9-ta parlamentare që nga viti ’91. Z. Berisha është i shtati në listën e qarkut të Tiranës. Si ndiheni me këtë numër dhe me këtë vend?

BERISHA: Shumë komod, absolutisht.

DERVISHI: Komod se është vend i sigurtë?

BERISHA: Jo, nqs numri mund të pretendohej se mund të ishte më parë, unë them se mund të ishte edhe më mbrapa. Domethënë unë kam një problem në këto zgjedhje. Problemi im është një status që unë kam, të cilit edhe po të dua t’i iki, nuk i iki dot.

DERVISHI: Në ç’kuptim status?

BERISHA: Si ish-kryetari i PD-së, si ish-kryeministër, si ish e ish me radhë…

DERVISHI: Domethënë po e frenoni veten për të mos qenë aktiv në fushatë?

BERISHA: Padiskutim. Normale dhe s’mund të jem një zë vokal në fushatë sepse fushata ka një zë dhe ai është i liderit të partisë. Përpiqem me mënyrat e mia nga mëngjesi deri në darkë të ndihmojë PD-në. Kjo është.

DERVISHI: Por aktiviteti juaj publik ndiqet më shumë se kushdo tjetër dhe jo vetëm në rrjetet sociale. Kjo fushatë është krejt e ndryshme nga të tjerat, por nuk kemi parë asnjë koment/qëndrim tuajin për fushatën?

BERISHA: Ke të drejtë! Cila është fushata?! Cilat janë konsideratat e mia?! Kjo është një fushatë unike në historinë e vendit. Kemi një opozitë…

DERVISHI: Kemi opozitë në këtë fushatë?!

BERISHA: Kemi opozitë në këtë fushatë, opozitë të bashkuar, e cila në unikalitetin e fushatës, ka një program që do të thosha që pavarësisht se….

DERVISHI: Të cilin unë ende nuk e kam gjetur në website…

SALI BERISHA: Që pavarësisht se analistët nuk e kanë kapur, por unë mund të them se është absolutisht një nga programet më revolucionare në 27 vjeçare historinë e vendit. Dhe ku qëndrojnë pikat?! Së pari, ky program ka kapur për brirësh problemin themelor të vendit, që është problemi i ekonomisë. Kryetari i PD-së në këtë program ka marrë përsipër një nga vendimet më të vështira dhe më të rëndësishme që mund të marrë një forcë politike në Europë, që është ulja e TVSH-së nga 20% në 15%. 

(M.D/Shuplaka)