Më politike se kaq nuk kishte ku të shkonte. Edi Rama ka nisur punën për të ndarë ”tepsinë”, siç ai e quante gjatë fushatës administratën shqiptare dhe cilat janë dy vendimet e para? Vendosja e dy socialistëve të besuar në krye të Hipotekave e Drejtorisë së Përgjithshme të Burgjeve.
Sigurisht që nuk e ka bërë drejtpërdrejtë, pasi nuk është kryeministri që emëron drejtorët, por faktet, siç u zhvilluan në një ”show” të tij televiziv në Berat, ku një drejtor i ALUIZNI-t u shkarkua vetëm nga fjala e Ramës duke u bërë ”kokë turku”, tregojnë se ka gjasa të ndodhë krejt e kundërta.
”…si mund të rrijë më në detyrë qoftë edhe një ditë pas kësaj prove turpëruese për shtetin?! Jo nuk mund të rrijë natyrisht, as ai dhe askush tjetër…”, postonte Rama në profilin e tij në ”Facebook”, ku vendos edhe fletë-rrufe për emra të njohur të mjekësisë, drejtësisë, administratës.
Në krye të Drejtorisë së Përgjithshme të Burgjeve është vënë Arben Çuko, deputet deri në shtator, i Partisë Socialiste për Fierin. Ndërsa Blerina Doracaj ka marrë Zyrën e Regjistrimit të Pasurive të Paluajtshme, duke qenë kryetare e Forumit të Gruas Socialiste në Tiranë, njëkohësisht këshilltare e Këshillit Bashkiak të Bashkisë së Tiranës.
Kryeministri i votuar edhe për një mandat të dytë ka nisur një tur dëgjesash në Shqipëri, duke i pyetur socialistët që mblidhen rreth tij se si i mendojnë 100 ditët e para të qeverisjes, megjithse vendimet e para janë marrë. Sipas gjasave ndarja e tepsisë, te të besuarit socialistë do vazhdojë me ”dorë të hekurt” duke penalizuar çdo drejtor që nuk është mes të besuarëve të PS-së.(V.G/SHUPLAKA)
