Detaje të reja bëhen të ditura lidhur me Mikel Shallarin, të akuzuar për vrasjen e ish-kryekomisarit Artan Cuku, për të cilin gjykata vendosi dje masën e sigurisë “arrest me burg”.
Për arrestimin e tij, policia bëri me dije se janë përdorur të gjitha metodat speciale të hetimit, nga provat shkencore tek informacionet operative.
Një ndër to ka qenë edhe një “kurth” i Policisë Rrugore, e cila e ndaloi Shallarin dy javë përpara arrestimit. Me justifikimin se ishte ndaluar për të kryer një test alkooli, policia përfitoi një profil gjenetik përmes pështymës të të dyshuarit në gypin e dragerit.
Kjo ishte metoda që policia përdori për të zhdukur dyshimet se pas vrasjes së Artan Cukut dhe rrobave që u gjetën në vendngjarje qëndronte Mikel Shallari.
Një ditë më parë, Prokuroria zbuloi detajin që e tradhëtoi autorin e dyshuar: “Policia sekuestroi në zonë rrobat e krimit. Gjurmët u gjetën në një kosh plehrash afër vendngjarjes. Ka përputhshmëri gjenetike 100% të gjurmëve të gjetura. Identifikimi u bë përmes profilit të ADN-së.”
(XH.A/SHUPLAKA)
