Prej mëngjesit të sotëm ka nisur një aksion i madh i forcave të RENEA-s dhe FNSH-së në zonën e Niklës në Krujë, ku mësohet se janë shoqëruar 11 persona, mes të cilëve dhe disa personazhe të njohura të botës së krimit, që kanë marrë edhe më herët dënime nga ana e gjykatës.
Gjithçka ka nisur me fikjen e energjisë në këto zona në mënyrë që personat që ishin objektiv i kontrollit të mos largoheshin nga banesat e tyre, pasi këto të fundit janë të gjitha të pajisura dhe me kamera sigurie. Në aksion mësohet se janë përfshirë rreth 20 mjete të blinduara, ndërsa në krye të forcave policore qëndron vetë drejtori i Policisë së Shtetit Ardi Veliu.
Gazetarja e Fax News Xhensila Kodra konfirmon nga Nikla se 6 prej personave që janë shoqëruar janë si më poshtë: Flamur Haka, koka e bandës së Niklës, banesa e të cilit është kontrolluar e para nga ana e forcave policore, po ashtu janë shoqëruar edhe Mareglen Haka, Bedri Haka, Durim Bami, Valter Bami dhe Ylli Cangu (kunati i vëllezërve të Durim e Valter Bamit).
Personat e ndaluar do të tranferohen në drejtorinë e Policisë së Durrësit, ndryshe nga sa u tha në fillim se do të silleshin në Tiranë. Ndërkohë mbetet ende mister nëse do të ketë një urdhër ndalimi ndaj këtyre personave, që derimë tani mbajnë statusin e të shoqëruarit.
Po ashtu ende nuk ka një deklaratë zyrtare nga ana e Policisë rreth municioneve apo sasisë së lëndëve narkotike që mund të jenë sekuestruar në këtë operacion. Deri më tani konfirmohet sekuestrimi i një mjeti të blinduar.
Kujtojmë se Flamur Haka i njohur ndryshe si koka e bandës së Niklës ka pasur një dënim me 16 vite burg në vitin 2008, dhe mbetet mister si është kryer lirimi i tij, nëse ka përfituar ndonjë ulje dënimi në vitet që kanë pasuar.
https://www.youtube.com/watch?v=sr6etg0ajXs&feature=youtu.be
Discussion about this post