Një aksident i rëndë ka ndodhur në aksin rrugor Tiranë-Durrës, ku një person ka mbetur i vdekur.
Nga ajo që mësohet paraprakisht është se në aksident është përfshirë automjeti i deputetit të zgjedhur nga PDIU në Elbasan Aqif Rakipi. Viktima është identifikuar si S.S 53-vjeç dhe dyshohet se i ka prerë rrugën makinës tip ”Benz” të deputetit.
Ende mbetet e paqartë nëse në drejtimin e mjetit ka qenë vetë deputeti apo shoferi i tij. Po ashtu mësohet se Rakipi është vetëdorëzuar në Polici pas aksidentit.
Kanë qenë shumë të pakta informacionet e Policisë për ngjarjen dhe fillimisht është përfolur për një aksident në dalje të tunelit të Elbasanit.
Po nga foto më të fundit nga vendi i ngjarjes shihet se aksidenti ka ndodhur përballë tregut të frutave perimeve në dalje të kryeqytetit drejt Durrësit.
Njoftimi i policisë për aksidentin:
Rreth orës 04:41, jemi njoftuar se në rrugën Interurbane kryesore Vorë-Tiranë, në afërsi të mbikalimit të kthesës së Kamzës, konkretisht përballë me Tregun ushqimor ka ndodhur një aksident automobilistik.
Menjëherë është nisur patrulla e policisë për të verifikuar informacionin, e cila pak minuta më vonë ka konstatuar një person në rrugë pa shenja jete, dhe në këto momente, afërsisht në orën 04:51 minuta, Komisariati i Policise nr.2 ka njoftuar që në këtë Komisariat është paraqitur shtetasi A. R., me automjetin e tij, tip Mercedes (i dëmtuar në pjesën e përparme të tij) i cili deklaroi se ka përplasur një person në autostradë dhe po dorozohej në Komisariat.
Ndërkohë është formuar grupi hetimor dhe është kërkuar ndërhyrja e Prokurorit të gatshëm, por nuk u mundësua lidhja nëpërmjet celularit, të cilin e kishte të fikur.
Në keto kushte u kryen veprimet e para hetimore në vendin e ngjarjes dhe gjatë kryerjes së veprimeve, u njoftua Prokurori i Rrethit Gjyqësor Tiranë, i cili pasi u informua për rrethanat dhe veprimet e para, kërkoi që krahas Ekspertit autoteknik të Policisë, të caktoheshin edhe dy ekspertë të tjerë autoteknik të jashtëm, me qellim kryerjen e një ekspertimi autoteknik me grup ekspertesh.
Grupi hetimor po punon për zbardhjen e plotë të rrethanave dhe shkaqeve që shkaktuan aksidentin rrugor me pasojë vdekjen e kembesorit S.S., rreth 53 vjeç.
(E.K/SHUPLAKA)
