Vetëm një ditë më parë u grabit gjatë natës biznesi i familjes së ministrit të Mjedisit, Lefter Koka, në Durrës. Persona ende të paidentifikuar nga policia grabitën një kasafortë me rreth 600 mijë lekë brenda dhe një mjet tip furgon, me të cilin u larguan nga vendi i ngjarjes.
Policia njofton se kanë qenë tre persona të maskuar që kanë lidhur rojën dhe kanë hyrë në ambientet e kantinës.
Sipas “Panorama”, roja ka deklaruar në polici se nuk i ka njohur autorët, pasi ata kanë qenë të maskuar. Ai është shprehur se personat kishin ardhur rreth orës 04:00 dhe e kanë lidhur me qëllim që të kishin mundësi të vepronin lirisht.
Grabitësit pasi nuk kanë arritur dot të hapnin kasafortën e kanë marrë atë me vete, duke e ngarkuar në një nga furgonët e kantinës dhe më pas janë larguar.
DETAJE:
“Më datë 19.06.2017, rreth orës 04:00, në Rrashbull, në kantinën e verës “Gjergj Kastrioti”, tre persona me maska kanë hyrë në ambientet e kantinës, kanë lidhur rojën dhe në një nga zyrat kanë marrë një kasafortë. Më pas kanë marrë edhe mjetin e kantinës, furgon tip “Benz”, me targa DR 3538 D, dhe janë larguar. Furgoni tip “Benz”, me targa DR 3538 D, është gjetur në fshatin Derven të Fushë-Krujës pas kontrolleve që policia kishte ushtruar në zonë pas denoncimit të grabitjes”, sqaroi Policia, e cila ka marrë në pyetje rojet e sigurisë për detaje të tjera të ngjarjes, ndërsa po bëhen edhe verifikime të kamerave të sigurisë. (J.V/Shuplaka)
Discussion about this post