Selami Simsek, i arrestuar pak muaj më parë në aeroportin e Rinasit, duket se do të bëjë të gjitha përpjekjet për të qendruar në Shqipëri, dhe për të mos patur fatin e mikut të tij Harun Çelik.
Pasi ndodhet prej disa muajsh në paraburgim, Simsek ka depozituar zyrtarisht një kërkesë për të përfituar azil politik në Shqipëri, pranë ambienteve të drejtorisë së migracionit dhe kufirit.
Në një komunikim që ka pasur me Fax News avokati i tij Elton Hyseni është shprehur se kërkesa për azil është bërë që në datën 8 Janar, dhe nuk ka marrë asnjë përgjigje nga ana e autoriteteve.
“Simsek e ka bërë kërkesën me postë që në datën 8 Janar, dhe nuk kemi marrë asnjë përgjigje, edhe pse iu kemi bërë rikujtesë disa ditë më vonë.
Normal që është i frikësuar se mund të ketë të njëjtin fat si miku i tij. Askush nuk na njoftoi se Çelik do të dëbohej, ishte një veprim arbitrar, dhe normalisht që mund të ndodhë e njëjta gjë dhe me Simsek.
Nuk e kuptoj si nuk ka pasur një reagim derimë tani nga Drejtoria e Migracionit dhe e Kufirit. Ne kërkojmë vetëm që të respektohet procedura, të verifikohet nëse jemi në kushtet e duhura apo jo për të përfituar azil”, shprehet avokati Hyseni.
Simsek pretendon se në Turqi i rrezikohet jeta, dhe për këtë shkak ai kërkon që të përfitojë azil. Avokati këmbëngul se në rast se ka një urdhër dëbimi, duhet të ketë njoftim disa ditë më parë se kjo të ndodhë.
Discussion about this post