Ministrja e Shëndetësisë dhe Mbrojtjes Sociale znj. Ogerta Manastirliu ndoqi nga afër nisjen e programit të shërbimit shëndetësor në komunitet, në periferinë e qytetit të Gjirokastrës, ku u realizua programi i vaksinimit të fëmijëve të komunitetit rom.
89 fëmijë të këtij komuniteti, në lagjen Zinxhira në Gjirokastër, u vaksinuan për herë të parë sipas kalendarit të detyrueshëm të vaksinimit.
“Kemi nisur një program shumë të rëndësishëm të Ministrisë së Shëndetësisë dhe Mbrojtjes Sociale siç është programi I kujdesit shëndetësor në komunitet. Aktualisht, me njësinë tonë të lëvizhshme po kryejmë vaksinimin, sipas kalendarit të vaksinave, të fëmijëve 0-14 vjeç të komunitetit rom këtu në Gjirokastër. Është një program të cilin ne do ta zhvillojmë në të gjithë Shqipërinë”, u shpreh Ministrja Manastirliu.
Më herët, Ministrja e Shëndetësisë dhe Mbrojtjes Sociale, së bashku me deputeten e qarkut Gjirokastër, znj. Mirela Kumbaro zhvilluan një vizitë në Qendrën e Autizmit në qytetin e Gjirokastrës, ku MShMS nisi një program të ri patronazhimi, duke mundësuar testimin e fëmijëve autikë të kësaj qendre, shërbim që më parë këta fëmijë detyroheshin ta merrnin vetëm në Tiranë.
Dr. Florida Dobi, psikiatre për fëmijë dhe adoleshente në QSUT realizoi testimin e fëmijëve me nevoja të veçanta, gjë e cila ndihmon në përcaktimin më të saktë të terapisë individuale që do të ndiqet për zhvillimin e secilit prej fëmijëve të Qendrës së Autizmit në Gjirokastër.
“Ministria e Shëndetësisë dhe Mbrojtjes Sociale ka në programin e saj integrimin e programeve sociale dhe shëndetësore. Falë patronazhit nga mjekët e Qendrës Spitalore Universitare jo vetëm të kësaj qendre për zhvillimin e fëmijëve por edhe të qendrave të tjera sociale në të gjithë vendin, po bëhet një hap më shumë drejt integrimit e shërbimeve socio-shëndetësore dhe për përfshirjen e tyre në sistemin tonë të kujdesit për fëmijët”, u shpreh Ministrja Manastirliu.
(F.M/Faxweb)
https://www.youtube.com/watch?v=Tdhhf0T4sj0&feature=youtu.be
