Shqipëria vijon të vuajë zjarret e shumta pothuajse në të gjithë vendin. Për këtë në ndihmë për shuarjen e tyre do të vijnë edhe dy avionë nga Greqia, sipas vendimit të Komisionit Europian.
Avionët nga Greqia do të kontribuojnë përmes Mekanizmit të Mbrojtjes Civile Europiane.
Komisioneri qipriot për Ndihmën Humanitare dhe Menaxhimin e Krizave, Christos Stilianidis, përshëndeti këtë vendim të Komisionit Europian për ndihmën që i ofrohet Shqipërisë.
“Dëshiroj të falenderoj autoritetet greke për bujarinë e treguar dhe mbështetjen ndaj Shqipërisë për herë të dytë, duke dërguar dy avionë shtesë për të ndihmuar vendin fqinj në këto orë të vështira. Ky është një shembull konkret i solidaritetit të Evropës me mbështetjen e dhënë përmes Mekanizmit të Mbrojtjes Civile të BE-së”, tha eurokomisioneri Stilianidis, shkruan tvklan.
Shqipëria dorëzoi kërkesën e parë në KE më 2 gusht për ndihmë në luftën kundër zjarreve. Pas kësaj kërkese, Greqia fillimisht dërgoi dy avionë në datat 3-6 gusht për shuarjen e flakëve të zjarrit në zonat jugore të prekura. Vendimi i sotëm i KE do të mundësojë edhe dy avionë të tjerë shtesë nga Greqia për shuarjen e zjarreve. (B.H/Shuplaka)
Discussion about this post