Presidenti i Republikës së Kosovës, Hashim Thaçi ka shpallur zgjedhjet e jashtëzakonshme për kryetarët e 4 komunave në Veri të vendit pas dorëheqjes nga posti të kryetarëve me përkatësi serbe.
Në një njoftim të bërë publik për mediat, Thaçi njofton se, sot ka nxjerr vendimin për caktimin dhe shpalljen e datës së zgjedhjeve të jashtëzakonshme për kryetar në komunat: Mitrovica e Veriut, Zubin Potok, Leposaviq dhe Zveçan.
“Presidenti i Republikës së Kosovës, Hashim Thaçi, në mbështetje të kompetencave kushtetuese dhe ligjore, duke marrë parasysh shkresën e Ministrisë së Administrimit të Pushtetit Lokal dhe pas një procesi të konsultimeve përkatëse me partitë politike dhe Komisionin Qendror të Zgjedhjeve, sot ka nxjerr vendimin për caktimin dhe shpalljen e datës së zgjedhjeve të jashtëzakonshme për kryetar në komunat: Mitrovica e Veriut, Zubin Potok, Leposaviq dhe Zveçan”, shkruhet në njoftimin e presidencës.
